>

«Մենք խորապես մտահոգված ենք անհանդուրժողականության ու ատելության հռետորաբանությունից, ինչպես նաև նախընտրական փուլում ընդդիմության նկատմամբ քաղաքական հետապնդումների առթիվ։ Սա չի կարող տեղ ունենալ ժողովրդավարական հասարակությունում», Հայաստանում արտահերթ ընտրության գործընթացի վերաբերյալ հայտարարել է ԵԺԿ նախագահ Ժոզեֆ Դոլը, հաջողություն մաղթելով եվրոպական այդ կուսակցությանն անդամակցող ՀՀԿ-ին:

Հայաստանում ընդունված է համարել, որ եվրոպական ինտեգրացիայի դեմ տարիներ շարունակ աշխատել են «դատարկ դհոլները», իրենց հայտնի դիրքորոշումներով: Իրականում սակայն, Հայաստանի եվրաինտեգրման քաղաքականության դեմ աշխատել են նաեւ դոլները՝ առանց հ-ի:




Քոչարյանի զոհերը

Աշխատել են Հայաստանի ներքաղաքական իրավիճակի, ներհամակարգային իրողությունների, ներիշխանական հարաբերությունների բնույթի հանդեպ բացարձակ անհամարժեքությամբ եւ այդ անհամարժեքության վրա կառուցված մեխանիկական քաղաքականությամբ:





Երբ օրինակ ԵԺԿ նախագահը մտահոգություն է հայտնում արտահերթ ընտրության գործընթացում «ընդդիմության նկատմամբ քաղաքական հետապնդումների» մասին, դա հարված է Հայաստանում Եվրոպայի հեղինակությանը: Որովհետեւ, եթե օրինակ Դոլը ընդհանրապես չի պատկերացնում, թե ինչ է տեղի ունեցել Հայաստանում, կամ դա պատկերացնում է ՀՀԿ մատուցմամբ, ապա դա իհարկե իր խնդիրն է, բայց երբ նա իր խնդիրը վերածում է Եվրոպայի ամենամեծ կուսակցության նախագահի անունից տարածվող հայտարարության, դա արդեն դառնում է Հայաստանում Եվրոպայի խնդիրը:

Որովհետեւ Հայաստանի հանրությունը կարող է պատկերացնել ու հասկանալ, թե օրինակ ինչի համար կարող է այդօրինակ աղմուկ հանել ՀՀԿ-ն, բայց թե ինչի համար կարող է այդ աղմուկին միանալ ԵԺԿ-ն, առանց լիովին խորամուխ լինելու դրա այսպես ասած հիմնավորումների առկայության հարցում, Հայաստանի հանրության համար թերեւս դժվար է ընկալել ու պատկերացնել:


Կամ, ավելի շուտ դժվար չէ, սակայն այդ դեպքում առաջանում է եվրոպական քաղաքականության ընկալումների խնդիր: Հայաստանի հանրությունը Եվրոպան դիտարկում է իբրեւ Հայաստանի արդիականացման կարեւորագույն եւ արժեքավոր գործընկեր: Մյուս կողմից, Հայաստանի այն շրջանակները, որոնց համար արդիականությունը քաղաքական եւ անգամ տնտեսական մահ է, տարիներ շարունակ փորձում են դրանից խուսափելու համար նենգափոխել Եվրոպայի հանրային ընկալումը Հայաստանում:

Դրա համար մի կողմից փորձ է արվում եվրոպական արդիականությունը ասոցացնել գերազանցապես «փոքրամասնությունների դավադրության», «ազգային արժեքների դեմ արշավի» հետ, ինչպես նաեւ համոզել, որ եվրոպական կոռուպցիան իրականում ոչնչով չի տարբերվում եվրասիականից:

Ընդ որում, ինքնախաբեություն կլինի ասել, թե նենգափոխման եւ աղավաղման այդ փորձերը չեն ունենում հաջողություն: Ունենում են: Եվ այդ հաջողությանը նպաստող քայլ է օրինակ ԵԺԿ նախագահ Ջոզեֆ Դոլի հայտարարությունը, ինչպես եվրոպացի այլ տարբեր պաշտոնյաների ու դիվանագետների ամենատարբեր հայտարարություններն ու ընդհանրապես վարքագիծը, ինչը էապես ազդել է Հայաստանի հարցում եվրոպական քաղաքականության արդյունավետության վրա, իհարկե բացասական իմաստով:



Թավշյա հեղափոխությունը ոչ միայն Հայաստանի համար է վերափոխման հնարավորություն, այլ նաեւ Հայաստանի հարցում աշխարհքաղաքական բոլոր գործընկեր կենտրոնների, այդ թվում եվրոպական քաղաքականության համար:

Պարզապես պետք է զբաղվել այդ քաղաքականությամբ, ոչ թե «դհոլ» նվագելով:

Աղբյուր՝ Lragir.am

Նյութը պատրաստեց ingablog.ru-ն


от admin

-->