>

ՀՀ երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանի կարծիքով՝ երեկ Քոչարյանի կալանքը գրավով փոխարինելու միջնորդության հետաձգումը քաղաքական առումով երկու տեսանկյունից կարևոր է. «Առաջին հերթին՝ իշխանությունները հերթական անգամ օգնեցին ապացուցել, որ տեղի ունեցողը պարզ քաղաքական հետապնդում է, որն իրականացվում է երկրորդ նախագահի նկատմամբ։

Ուշադրություն դարձրեք քննիչի գործելակերպին, ընդհանրապես՝ հետաքննող մարմնի, Դատախազության գործելաոճին, երբ կալանքի հարց է, դատական նիստերը նշանակվում են գիշերը՝ ժամը 1-ին, այնքան որ, ափալ-թափալ կալանավորեն, իսկ երբ անազատությունից դուրս գալու հարց է քննարկվում, պարզվում է, որ քննիչն այնքան զբաղված է, որ 18։30-ից հետո ոչնչով չի կարող զբաղվել։ Երբ կալանքի հարց է քննարկվում, գլխավոր դատախազը 5 դատախազով է գալիս դատարան, իսկ այս դեպքում ոչ մեկը ժամանակ չէր գտել։

Այսինքն՝ սա այնքան պարզ է ամեն ինչ ցույց տալիս, որ նույնիսկ ամենալավատեսների մոտ ոչ մի հույս չի մնում, որ Հայաստանում չի գործադրվում ուժգին ճնշում դատարանների վրա։ Դա արձանագրում են արդեն բոլորը։ Իրականացվում է ուղիղ քաղաքական հետապնդում երկրորդ նախագահի հանդեպ, և, ըստ էության, մենք այսօր ունենք առնվազն խղճի բանտարկյալ, եթե չասեմ՝ քաղբանտարկյալ՝ ի դեմս երկրորդ նախագահի, որը մոտակա օրերը ևս անազատության մեջ կանցկացնի»։




Քոչարյանի զոհերը

Վիկտոր Սողոմոնյանը լակոնիկ հարցազրույցը տվել է իրենց թիմի կողմից վերահսկվող Yerevan Today-ի լրագրողին, ով, բնականաբար, ոչ մի, այսպես ասած, անհարմար հարց Քոչարյանի «աջ թևին» չի տվել։





Երեկ Քոչարյանի հարցի հետ կապված ցանկացած լուծում քաղաքականացվելու էր, որովհետև դատական նիստից տառացիորեն մի քանի ժամ առաջ երկրորդ նախագահի գրասենյակն, ըստ էության, դիմել էր քարոզչական սադրանքի՝ հրապարակելով Ռոբերտ Քոչարյանին ուղղված Վլադիմիր Պուտինի շնորհավորական ուղերձը։

Սա դատարանի որոշման վրա ազդելու ուղղակի փորձ էր, ընդ որում՝ ամենանվաստացուցիչ եղանակով, երբ փորձ է արվում ցույց տալ, թե պաշտոնաթող նախագահի թիկունքին կանգնած է Պուտինը։ Այլ խոսքով՝ եթե Վիկտոր Սողոմոնյանը իշխանություններին մեղադրում է քաղաքական պատվերներ իջեցնելու մեջ, առնվազն կոռեկտ պետք է լինի ու խոստովանի, որ Մարտի 1-ի գործն՝ առհասարակ, ու դրա երեկվա դրվագը՝ մասնավորապես, քաղաքականացրել են հենց իրենք։


Այնքան էլ պարզ չէ, թե քաղաքականապես որքանով է մոտիվացված դատական երեկվա նիստի հետաձգումը, բայց՝ եթե նույնիսկ դա այդպես է, ապա դատախազությունը միանգամայն ճիշտ է վարվել, որովհետև փորձել է դատարանը դուրս բերել քաղաքական մամլիչի այն ռեժիմից, որը ստեղծել էր Քոչարյանի թիմը՝ Պուտինի շնորհավորական ուղերձը հրապարակելով։

Ռոբերտ Քոչարյանը մեղադրվում է ծանր հանցագործություն կատարելու մեջ, նա տապալել է սահմանադրական կարգը, ինչի հետևանքով Հայաստանի առնվազն տասը քաղաքացի է զոհվել ու միայն այն փաստը, որ նա՝ քննության շահերից ելնելով, անազատության մեջ է՝ հիմք չի տալիս պնդելու, որ գործ ունենք քաղաքական հետապնդումների կամ քաղաքական հալածյալի հետ։ Ի վերջո որտեղից Վիկտոր Սողոմոնյանին համոզմունք, որ եթե դատարանը երեկ վճիռ արձակեր, ապա Քոչարյանի կալանավորումը փոխարինելու էր գրավով, ու երկրորդ նախագահը հայտնվելու էր ազատության մեջ։ Արդյո՞ք Սողոմոնյանը տեղեկատվություն ունի, որ դատարանի հետ համապատասխան «աշխատանք» է տարվել։

Մյուս կողմից՝ Քոչարյանի թիմի ջղաձիգ վիճակը միանգամայն հասկանալի է։



Երկրորդ նախագահի միակ հույսը մնում է Պուտինի ուղղակի միջամտությունը Հայաստանի ներքին գործերին, իրեն ցուցաբերվող աջակցությունը, իսկ հիմա պարզվում է, որ Հայաստանում «ասողն» ամենևին էլ Ռուսաստանի նախագահը չէ։

Բացի այդ՝ եթե նույնիսկ իրադարձությունները երեկ երկրոդ նախագահի համար անցանկալի հունով գնային ու Քոչարյանը մնար կալանքի տակ, ապա նրա թիմը մի աննխադեպ վայնասուն կբարձրացներ, թե իբր Նիկոլ Փաշինյանը հակադրվում է Պուտինին՝ այդպիսով քարոզչական հերթական խմբաքանակը ապահովելով Հայաստանի դեմ կապմանիա իրականացնող ռուսական ու ադրբեջանական որոշակի շրջանակների համար։

Սակայն շատ ավելի տեղին կլինի, որ Ռոբերտ Քոչարյանը ոչ թե հույսը դնի Պուտինի «մեծահոգության» վրա, այլ նրան շանտաժի ենթարկի՝ Հոկտեմբերի 27-ի մասին պարբերական հիշեցումներով։ Ժամանակին ոճրագործ Նաիրի Հունանյանը հենց այդպես էր անվտանգության երաշխիքներ կորզում Ռոբերտ Քոչարյանից։ Հիմա Քոչարյանը հայտնվել է Հունանյանի կարգավիճակում։

Աղբյուր՝ 1in.am

Նյութը պատրաստեց ingablog.ru-ն


от admin

-->