>

Այսօր ԱԺ-ում Ընտրական օրենսգրքի փոփոխությունների հարցով աշխատանքային խմբի նիստը, որին մասնակցում է նաև ՀՀ վարչապետին կից ԸՕ փոփոխությունների մասնագիտական հանձնաժողովի քարտուղար Դանիել Իոաննիսյանը, վերածվեց երկկողմ հարաբերություններ պարզելու հարթակի:

Դ. Իոաննիսյանը նշեց, որ կառավարական հանձնաժողովում կան հարցեր, որոնք դեռ ենթակա են քննարկման, որոշ հարցերի շուրջ արդեն կան հստակ դիրքորոշումներ, և ակնկալվում է, որ իրենց աշխատանքային խումբը նախագիծ պատրաստելու է:

Ըստ նրա՝ բնական է, ոչ ոք չի կարող և իրավունք չունի ԱԺ պատգամավորներին արգելել նախագիծ շրջանառել: Դ. Իոաննիսյանի խոսքով՝ իրենք հենվում են կոնսենսուսային մոտեցումների վրա, պետք է ամբողջացնեն հայեցակարգը, որից հետո կգրվի ԸՕ-ում փոփոխություններ կատարելու նախագիծը.

«Մեր հանձնաժողովը մասնագիտական հանձնաժողով է, և հարցերը քննարկվում են մանրակրկիտ, բոլոր կողմերն ուսումնասիրելուց հետո: Այդ պատճառով մենք չենք կարող գերձայնային արագությամբ հայեցակարգ գրել և նախագիծ ներկայացնել»:




Քոչարյանի զոհերը

ԱԺ ՀՅԴ խմբակցության ղեկավար Արմեն Ռուստամյանը նշեց, որ իրենք սա արդեն մի փուլով անցել են, հայտնի են այն սկզբունքային առաջարկությունները, որոնց հիման վրա պետք է կատարվի փոփոխություն.


«Մենք ուզում ենք հասկանալ՝ զուգահեռ աշխատելով, հասնելով ինչ-որ մի ամփոփման, որը տանելու է ուղղություններ, որոնցով պետք է փոխվի ԸՕ-ն, հետո տեխնիկական հարց է, թե ոնց է վերածվելու նախագծի, հետո ուղարկվի Վենետիկի հանձնաժողով, արդեն արտախորհրդարանական ուժերից ստանում ենք առաջարկներ: Դուք զուգահեռ այդ աշխատանքը տանում եք, չեք կարծո՞ւմ, որ կարելի է միացնել և այն ուղղությունները, որոնք պետք է ԸՕ փոխվի, առնվազն այդտեղ համաձայնության գանք»:





Դ. Իոաննիսյանը շեշտեց, թե իրենց հանձնաժողովը մասնագիտական է, լսում են բոլորի առաջարկները՝ անկախ նրանից, թե ով է ներկայացնում այն, դրանք բոլորը քննարկում են, գնահատում առաջարկի բովանդակությունը և կա՛մ ընդունում, կա՛մ ամրագրում հայեցակարգի մեջ՝ հետագայում ԸՕ-ում ամրագրելու նպատակով:

Նա պատրաստակամություն հայտնեց լսել քննարկված հարցերը, արդեն որոշ առումով քննարկել են այստեղ հնչած հարցերը, որոշ գաղափարներ արաժանացել են հավանության և ամրագրվել հայեցակարգում. «Ես չեմ պատկերացնում, թե ինչպես կարող է այս քաղաքական հանձնաժողովի և մեր մասնագիտական հանձնաժողովի աշխատանքը համատեղվել: Մենք այստեղ չենք գալու ինչ-որ բազար անելու, ներեցեք արտահայտությանս համար: Մենք ուզում ենք զուտ լսել առաջարկությունները և դրանք քննարկել մասնագիտական ֆորմատով»:

«Մենք այստեղ բազար չենք անում»,- հակադարձեց Ա.Ռուստամյանը:

Դ. Իոաննիսյանը նշեց, որ «բազար» այդ իմաստով չի ասում, նկատի ունի՝ ներկայանալ ԱԺ, քննարկել կողմ կամ դեմ: «Մենք չենք կարող ներգրավվել այս հանձնաժողովի մեջ, սա ամեն դեպքում քաղաքական մարմին է, քաղաքական դիրքորոշումներ են արտահայտվում»:

«Ծառուկյան» խմբակցության պատգամավոր Նաիրա Զոհրաբյանի խոսքով՝ Վենետիկի հանձնաժողովի համար ընդունելի է լինելու այն տարբերակը, որն ընդունելի կլինի քաղաքական ուժերի համար, «Վարդուշի» առաջարկը չի ընդունելու: Նա հարցադրում արեց, թե ո՞վ է ԸՕ-ի շատ ավելի բարձր մասնագետ, քան այստեղ հավաքված ուժերը. «Մենք, ի վերջո, վատ բան չենք ասում, ասում ենք՝ Սիզիփոսյան աշխատանք չանենք»:


«Կոնսենսուսի հետևից ընկնելու, քննարկումների մեջ ընկնելու մտադրություն չունենք: Մենք հստակ լսում ենք առաջարկները, այդ հարցի վերաբերյալ հայտնում տեսակետ»,- շեշտեց Դ. Իոաննիսյանը՝ չբացառելով համագործակցսւթյունը, բայց նաև կարևորելով բովանդակությունը:

«Դուք առաջինը չեք քաղաքացիական հասարակության մեջ, որը կարծում է, որ քաղհասարակությունը պետք է կառավարի պետությունը: Դա շատ տարածված մոլորություն է: Մասնագիտական հանձնաժողովները ստեղծվում են՝ ձևակերպելու այն կոնսենսուսը, որ կա քաղաքական ուժերի միջև»,- հայտարարեց ՀՀԿ-ական ներկայացուցիչ Վիգեն Սարգսյանը: Նա հարցադրումներ արեց՝ ո՞վ է շարադրել քաղաքական պատվերը, ԸՕ 150 տարբերակ կա, ո՞ր մոդելն եք վերցնում, ո՞վ է քվեարկելու դրան:

«Ի՞նչ եք դուք գրում, ի՞նչ եք մեզ էստեղ ասում: Շատ անհասկանալի է ձեր դիրքորոշումը, և հուսանք՝ դա ձեր անձնական դիրքորոշումն է, ոչ թե հանձնաժողովի, որովհետև դա շատ հիասթափեցնող կլիներ քաղաքական մշակույթի առումով»,- ասաց Վ.Սարգսյանը:

Դ. Իոաննիսյանն ընդգծեց, որ դա վարչապետին կից հանձնաժողով է, այն կառավարության կամ որևէ մարմնի իրավաբանական վարչություն չէ, որ պատվեր իջեցնեն, իրենք էլ դրա հիման վրա ինչ-որ բան գրեն, այլ լսում են բոլոր կողմերին, և աշխատանքն արվում է շատ ավելի ներառական, քան ՀՀԿ-ն էր անում, գաղտնի ձևով նախագիծ էր գրում:

«Ի՞նչ եք խոսում, ի՞նչ եք խոսում»,- վրդովվեց Վ.Սարգսյանը:

Դ. Իոաննիսյանը հորդորեց իրեն չստիպել նման քննարկում անել, և նշեց, որ հանձնաժողովը պատվերը ձևավորողն է, թե ինչպիսին պետք է լինի ԸՕ-ն, որ ապահովի այն, ինչ խոստում տրվել է ՀՀ քաղաքացիներին Նիկոլ Փաշինյանի վարչապետ ընտրվելու ժամանակ և ամրագրվել է կառավարության ծրագրում:



«Պետության և իրավունքի տեսության դասագրքեր կարդացեք, հա՞: Պատվեր ձևավորելը քաղաքական ուժերի խնդիր է: Եթե մասնագիտական հանձնաժողով եք, դուք ԸՕ ձևակերպելու միայն մի փոքր մասին եք տիրապետում, բայց դուք չասացիք, թե ինչ փորձագիտություն ունեք, որպեսզի ԸՕ գրեք: ԸՕ-ն քաղաքական փաստաթուղթ է, իրավական չէ: Այդ հանձնաժողովն ո՞ւմ կամքն է ձևավորում»,- հայտարարեց Վ.Սարգսյանը:

Դ. Իոաննիսյանը նկատեց, թե գուցե քաղաքացիներին տրված նախընտրական խոստումն անտեսված է, բայց շատ կարևոր դրույթ է: Մասնագիտական կարողությունների վերաբերյալ նշեց, որ հանձնաժողովում ներգրավված են արդարադատության նախարարը, ԿԸՀ-ի 2 անդամ, քաղաքացիական հասարակությունից այն կազմակերպությունների ներկայացուցիչներ, որոնք ընտրությունների ժամանակ իրական, ոչ թե ֆեյք դիտորդություն են իրականացրել և ներկայացրել են կոմպլեքս առաջարկներ:

Ա.Ռուստամյանը հարցադրում արեց, թե կառավարական հանձնաժողովն օրենսդրական նախաձեռնության իրավունք չունի, ո՞վ պետք է պաշտպանի այն՝ կառավարությո՞ւնը, անհա՞տ պատգամավոր:

«Դա տեխնիկական հարց է, բայց մեր հանձնաժողովի ետևում կառավարությունն է կանգնած»,- պատասխանեց Դ. Իոաննիսյանը:

«Ստեղ մուսկուլներով խաղ է գնում»,- նկատեց «Ելքի» պատգամավոր Ալեն Սիմոնյանը՝ կոչ անելով հասկանալ, թե ինչ օրակարգով են աշխատելու:

ՀՀԿ ներկայացուցիչ Դավիթ Հարությունյանի կարծիքով՝ պետք է գտնել ոսկե միջինը և գալ կոնսենսուսի ու, ի վերջո, ծնել մեկ փաստաթուղթ: Ըստ նրա՝ ճիշտ է, որ կառավարական հանձնաժողովի գիտելիքն այստեղ ներկայացվի, և լինեին 5-րդ ուժ, ներկայացնեին իրենց մոտեցումները. «Ձեզ վնաս չենք տա, եթե վաղը որոշեք, որ՝ չէ, գնում եք ձեր նախագծով, գնացեք»:

Դ. Իոաննիսյանը ճշտեց, թե իրենք 5-րդ կողմ են, ոչ թե քաղաքական ուժ. «Ես երբեք չեմ ասի, որ այս քննարկումները պտղաբեր չեն, բայց միաժամանակ ես չեմ կարծում, որ ինչ-որ բան կարող ենք զիջել»:

Դ.Հարությունյանը կոչ արեց գործի անցնել: Եվ, ի վերջո, համաձայնության եկան, որ կառավարական հանձնաժողովը պետք է մասնակցի խորհդարանական խմբի նիստերին:

Աղբյուր՝ Yelaket.am

Նյութը պատրաստեց ingablog.ru-ն


от admin

-->